Американското Министерство за одбрана мора да инвестира повеќе во надградба на сензори и вселенска технологија на Арктикот за да биде во чекор со зголеменото присуство на Кина и Русија таму, вклучително и заеднички воени вежби, соопшти Пентагон.
Заменик-секретарот за одбрана Кетлин Хикс рече дека ова е „критично време“ за Арктикот и дека „климатските промени, противниците и влошената американска инфраструктура“ го принудуваат Министерството да размисли повторно како да го зачува Арктикот безбеден, пренесува АП.
Арктичката стратегија во голема мера бара поголеми трошоци за високотехнолошки сензорски и радарски системи, низа воена опрема и континуирани инвестиции во вселенската база „Питуфик“, базата на американските вселенски сили во северозападниот дел на Гренланд, пренесува Танјуг.
Водачите на Министерството за одбрана повеќе од една деценија предупредуваат дека САД треба да ги засилат своите активности на Арктикот за да го задржат чекорот со Кина и Русија бидејќи климатските промени го прават студениот регион попристапен.
Сепак, Арктикот со себе носи голем број предизвици, пренесува АП, вклучувајќи барања за пристаништа, оружје, беспилотни летала и опрема што може да ја издржат климата, како и дополнителни бродови кои можат да се справат со студени води и да го пробијат мразот.
Студеното време ја ограничува и воената обука и влијае на опремата.
А регионот, кој има ограничено сателитско покривање, бара многу поширок спектар на сензори за комуникација.
Кина ја зголеми сопствената активност во регионот, вклучувајќи ги и нејзините три брода-кршачи на мраз кои вршат цивилно-воени истражувања во регионот.
Русија, која има најголема арктичка територија, вклучително и важни стратешки нуклеарни капацитети, како што се силите за балистички ракети.