Соединетите Американски Држави му дале на Израел 6,5 милијарди долари помош од почетокот на војната на Блискиот Исток на 7 октомври, објави денеска Вашингтон пост, повикувајќи се на неименуван висок функционер во администрацијата на американскиот претседател Џозеф Бајден.
– Ова е огромен, масивен потфат – рече функционерот и додаде дека само минатиот месец на Израел му била укажана половина од споменатата помош, пренесува Ал Џезира.
„Вашингтон пост“ објави дека функционерот ја открил сумата за помош за да ја покаже длабочината на американската поддршка за Израел поради обвинувањата на израелскиот премиер Бенјамин Нетанјаху дека Вашингтон го задржува оружјето.
Официјалниот претставник рече дека бројките биле споменати во разговорите меѓу високи претставници на Белата куќа и израелскиот министер за одбрана Јоав Галант оваа недела во Вашингтон.