Заканите кон Русија мора да се сфатат сериозно, изјави денеска рускиот претседател Владимир Путин, додавајќи дека мора да има планови за адекватни одговори на заканите.
Тој посочи дека е неопходно да се зајакнат руските вооружени сили и морнарица, пренесува РИА.
– Сите го разбираме зголемениот степен на геополитичка тензија во современиот свет, редовно слушаме закани против Русија од владејачките кругови на голем број земји, па дури и гледаме конкретни активности за спроведување на овие закани. Секако, ова мора да се сфати максимално сериозно, да се пресметаат сите можни ризици и да се планираат адекватни одговори, а нашите вооружени сили и морнарица да се зајакнат – рече Путин.
Тој посочи дека е неопходно да се заштити флотата од ракетни напади со долг дострел.
– Неопходно е да ја заштитиме нашата флота од можни напади веќе на далечните приоди до поморските бази и областите на дејствување на нашите бродови – рече претседателот на Русија.