Руската полиција презеде аеродром во регионот на Дагестан со мнозинско муслиманско население и уапси 60 лица откако стотици анти-израелски демонстранти упаднаа во зградата во неделата додека авион пристигнуваше од Израел, соопшти Министерството за внатрешни работи.
Видео снимката на Ројтерс од неделата вечерта покажува млади демонстранти на аеродромот во Махачкала како веат палестински знамиња, ги кршат стаклените врати и трчаат низ аеродромот извикувајќи „Алаху Акбар“ или „Господ е голем“.
Забележана е друга група како се обидува да преврти патролен камион.
Дваесет лица беа ранети на аеродромот пред безбедносните сили да ги смират немирите, соопштија локалните власти.
Патниците во авионот се безбедни, соопштија припадници на безбедносните сили.
Немирите уследија по неколку други антиизраелски инциденти во последните денови во рускиот регион Северен Кавказ како одговор на израелската војна против милитантите на Хамас во Газа.
Локалната влада на Дагестан претходно објави дека ги зајакнува безбедносните мерки низ републиката, во која живеат околу 3 милиони луѓе.