Советот за безбедност на Обединетите нации ја отфрли руската резолуција со која се осудува насилството и тероризмот врз цивилите, но не го спомна Хамас, кој уби 1.300 Израелци во ненадеен напад.
Само четири земји ѝ се придружија на Русија во гласањето за резолуцијата, а тоа се Кина, Обединетите Арапски Емирати, Мозамбик и Габон.
САД, Велика Британија, Франција и Јапонија гласаа против, а другите шест беа воздржани.
За усвојување се потребни најмалку девет гласови „за“ во петнаесетчлениот совет, според АП.
Пред гласањето, рускиот амбасадор Василиј Небензја повика на поддршка за резолуцијата, велејќи дека таа одговара на „невиденото влошување на сегашната криза“ со бројот на загинати и ранети се зголемува од час во час. Тој повторно ја осуди смртта на цивилите во Израел и Газа.
По гласањето, Небензја рече дека Советот повторно е заложник на себичните намери на западниот блок на земји и дека не успеал да испрати колективна порака насочена кон деескалација на најсериозната експлозија на насилство во изминатите неколку децении.
Британската амбасадорка во ОН Барбара Вудворд рече дека би било „несовесно овој Совет да го игнорира најголемиот терористички напад во историјата на Израел“.
Бидејќи руската резолуција беше отфрлена, таа рече дека ќе продолжат преговорите за ривалската бразилска резолуција, која исто така силно ги осудува сите насилства и непријателства врз цивилите и сите терористички акти, пренесува Срна.