Невладините организации кои спасуваат мигранти во Медитеранот ќе мора да ги симнат во земјите со чие знаме се веат нивните бродови, особено во Германија, доколку не се најде подобар компромис за статусот на азил и имиграција, изјави италијанската премиерка Џорџа Мелони во Малта.
Таа го отфрли амандманот претставен од Германија за статусот и улогата на невладините организации, додека во четвртокот во Брисел беше усвоена реформата на Пактот за азил и имиграција.
Текстот беше одобрен од земјите-членки на Европската унија, но Италија, изненадена од доцното поднесување на германскиот амандман, изрази резервираност и побара период на размислување.
– Тој амандман е „чекор назад“ и „затоа предлагаме друг амандман според кој државата е одговорна за пречекот на мигрантите кои се превезуваат на бродот на невладините организации на државата што го вее нивното знаме“, изјави Џорџа Мелони на новинарите на маргините на самитот на медитеранските земји од Европската унија во Малта .
Според информациите што ги пренесуваат италијанските медиуми, италијанскиот амандман бил отфрлен од министрите за внатрешни работи кои во четвртокот се состанаа зад затворени врати во Брисел.
Рим му замерува на Берлин што финансира неколку хуманитарни невладини организации во Медитеранот, од кои некои работат под германско знаме.