Африканскиот континент станува нов центар на моќ и сите ќе мора да ја земат предвид оваа објективна реалност, изјави денеска во Санкт Петербург рускиот претседател Владимир Путин.
На вториот самит „Русија-Африка“ тој истакна дека политичката и економската улога на африканскиот континент експоненцијално расте.
Путин истакна дека Русија ги почитува плановите на Африка за решавање на конфликтот во Украина, бидејќи тоа е акутен проблем и Москва не избегнува да разговара за ова прашање, пренесува РИА Новости.
– Да ја земеме, на пример, иницијативата на голем број африкански земји за решавање на украинската криза. Ова е акутен проблем, не избегнуваме да го разгледаме. Ова само по себе кажува многу, затоа што претходно сите посреднички мисии беа монопол на земјите со таканаречени развиени демократии. Сега не е така, сега Африка е подготвена да помогне во решавањето на проблемите кои се чини дека се надвор од зоната на нејзините примарни интереси. Ги почитуваме вашите иницијативи и внимателно ги разгледуваме – рече Путин.
Тој додаде дека Руската Федерација нуди помош за решавање на конфликтите на африканскиот континент и е подготвена да продолжи со обука на воен персонал и членови на агенциите за спроведување на законот во руските специјализирани образовни институции.
Путин, исто така, рече дека Русија секогаш ќе биде одговорен снабдувач на земјоделски производи, бесплатно, за сите земји на кои тоа им е потребно.
Тој изјави дека Москва планира да го зголеми своето дипломатско присуство на континентот и е подготвена за обнова и отворање на нови дипломатски претставништва.