Куманово ќе добие еден од најубавите паркови во државата, вели градоначалникот Максим Димитриевски давајќи отчет до каде е реконструкцијата на стариот градски парк.
Досега, како што информираше Димитриевски на вчерашната седница на Советот на Општина Куманово, реконструирани се сите патеки во паркот, а дополнително е изграден паркинг плац и игралиште за баскет.
– Веќе изготвивме идејно решение и проект за паркот. Тој треба да биде смарт парк, урбаната опрема е обезбедена од фирмата изведувач со смарт клупи, дополнителни клупи, кошници за смет итн. Мислам дека се оставени во ЈП „Чистота и зеленило“, свесно не се наместени додека целиот проект не се завшри во целост, бидејќи ќе бидат уништени и оштетени, појаснува градоначалникот.
Паркот треба да добие нови пешачки патеки со тартан подлога, велосипедски патеки, катчиња со дел за рекреација на деца, но и спортски центар.
– На една од следните седници ќе имаме и носење на одлука за прераспределување на средствата кои беа пренесени како вишок од 2020 година, а не се опфатени од овој буџет, мислам дека ќе има доволно средства и потоа Куманово да добие еден од најдобрите паркови во државата, додава првиот човек на градот.
Во меѓувреме се набавуваат нови садници кои ќе бидат жива ограда во паркот, а ќе бидат изградени и тротоари кои минуваат покрај самиот парк.
Реконструкцијата на паркот чини девет милиони денари, средства кои Општина Куманови ја следуваат по основ на рамномерен регионален развој.
Никола Ивановски