Дури 25 отсто од Македонците имаат позитивно мислење за рускиот претседател Владимир Путин, наспроти 18 отсто за американскиот Џо Бајден, покажа истражувањето на компанијата Цепер.
Популарноста на рускиот претседател Владимир Путин во 12 земји од централна Европа е во нагло опаѓање, а значително е намалена и популарноста на американскиот претседател Џо Бајден, покажуваат резултатите од истражувањето на јавното мислење спроведено во јануари оваа година од компанијата Цепер.
Посебно е интересно да се забележи дека, и покрај војната во Украина, Путин има поголема поддршка од Бајден во шест од 12-те земји во регионот.
Во ноември 2021 година, 77 отсто од Србите, 60 отсто од Бугарите и 57 отсто од Словаците имале „прилично позитивно“ мислење за Путин, но само 10 отсто од Полјаците, 21 отсто од Австријците и 31 отсто од Романците и една година по почетокот на рускиот напад врз Украина, ситуацијата се промени.
Најпозитивно мислење за Путин и натаму имаат Србите, каде претседателот на Русија го поддржуваат 59 отсто од испитаниците, додека неговата популарност е во нагло опаѓање во повеќето земји од регионот.
Позитивно мислење за него имаат еден процент од Полјаците, два проценти од Романците, пет проценти од Хрватите, шест проценти од Чесите, седум проценти од Австријците, 25 проценти од Унгарците, 37 проценти од Црногорците и 25 проценти од Македонците.
Во исто време, од крајот на 2021 година во регионот на Централна Европа, американскиот претседател Бајден ја загуби поддршката и во 10 од 12-те земји вклучени во истражувањето.
Популарноста на Бајден се зголеми од 39 на 71 отсто во Полска и од 63 на 68 отсто во Романија, но во сите други земји таа е во опаѓање.
Додека на крајот на 2021 година 65 отсто од Австријците имале добро мислење за американскиот претседател, сега само 40 отсто го поддржуваат. Тој е поддржан од 13 отсто во Бугарија и Србија, 15 отсто во Унгарија, 18 отсто во Македонија, 25 отсто во Словенија и 26 отсто во Хрватска и Словачка.
Путин има поголема поддршка од Бајден во пет од 12-те земји во регионот – Србија, Унгарија, Црна Гора, Бугарија и Северна Македонија.