Истражувачкиот новинар Илја Рождественски сподели со Си-Ен-Ен што дознал за оклопниот воз што Центарот за досиеја (Dossier Centre) вели дека рускиот претседател Владимир Путин го користи наместо својот приватен авион.
Центарот за досие е раководен од Михаил Ходорковски, рускиот опозициски лидер, а оваа организација, според нивната веб-страница, ги следи криминалните активности на луѓето поврзани со Кремљ.
„Од почетокот на руската инвазија на Украина, претседателот на Руската Федерација, Владимир Путин, престана да патува со приватен авион. Сега тој е фокусиран речиси на патување со специјален воз“, изјави Рождественски за Си-Ен-Ен.
Ходорковски тврди дека Путин сега патува исклучиво во воз опремен со специјален комуникациски систем.
Претходно, известувачот на Центарот за досие, Илја Рождественски изјави дека рускиот претседател е во страв.
„Се плаши дека може да биде нападнат, авионот да биде соборен од НАТО или украински авиони“, вели Реждевственски.
Тој додава дека Путин е исплашен и верува дека мора да се погрижи неговите патувања да останат тајни.
Тој опиша како изгледа обичен патнички воз во Русија, посочувајќи дека „путиновиот“ не се разликува многу од другите.
„Има неколку главни разлики. Прво, претседателските вагони се блиндирани. Второ, возот има најголем приоритет: распоредот на возот е прилагоден на Путин, така што неговиот воз може да сообраќа со максимална брзина и без застанување. Специјалниот воз мора да содржи: вагон за претседателот со спална и работна соба за состаноци, вагон за придружници и вагон за специјални комуникации“, се вели во извештајот на оваа истражна редакција.
Возот беше подготвен за претседателот уште во 2014-2015 година, но шефот на државата почна постојано да го вози во втората половина на 2021 година, кога руската армија почна да се подготвува за инвазијата на Украина.
Компанијата што го поседува возот му припаѓала на внукот на Јуриј Ковалчук.
Ковалчук е главен акционер на Банката на Русија и близок пријател на претседателот, чии структури управуваат со палатата на Путин во близина на Геленџик, се наведува во извештајот на Центарот за досие.