Кина денеска објави дека ќе преземе контрамерки против американските субјекти кои го поткопуваат кинескиот суверенитет, соопшти кинеското Министерство за надворешни работи.
Портпаролот на кинеското Министерство за надворешни работи, Ванг Венбин, го изјави ова на почетокот на редовниот брифинг со новинарите, откако САД соборија кинески балон и рече дека сакаат да санкционираат шест компании поврзани со кинеска програма поврзана со наводен кинески шпионски балон, објави Ројтерс.
„САД злоупотребија сила, претераа, ја ескалираа ситуацијата и ја искористија како изговор за незаконско санкционирање на кинеските компании и институции“, рече Ванг.
Кина цврсто се спротивставува на ова и ќе преземе контрамерки против релевантните американски субјекти кои го поткопуваат суверенитетот и безбедноста на Кина во согласност со законот, посочи тој.
Ванг рече дека Кина решително ќе го заштити својот суверенитет и легитимните права и интереси.
Администрацијата на американскиот претседател Џозеф Бајден додаде шест кинески ентитети поврзани со наводната кинеска програма за шпионски балон на црната листа за извоз.
Новите ограничувања доаѓаат откако Белата куќа соопшти дека ќе разгледа пошироки напори за разоткривање на кинеските шпионски активности кои ја загрозуваат националната безбедност на САД и нивните сојузници, соопшти агенцијата.