Целата европска помош е концентрирана во Турција, изјави грчкиот премиер Киријакос Мицотакис во интервју за ТВ Си-Ен-Ен, истакнувајќи дека прашањето за помошта за Сирија погодена од земјотресот треба да се разгледа на ниво на Европската унија, бидејќи е невозможно да се испорача стока таму поради санкциите.
Според него, овој земјотрес не ја погодил само Турција, туку и Сирија. Тој посочува дека ситуацијата во Сирија е уште потешка, бидејќи, всушност, нема официјален соговорник и затоа е потребно да се делува преку меѓународните организации.
На прашањето дали е можно да се испрати помош за Сирија, Мицотакис одговори негативно, нагласувајќи дека на седниците на ЕУ во четврток и петок ќе предложи координација на помошта за Дамаск на европско ниво.
Тоа би гарантирало дека испратената помош ќе биде доставена таму каде што навистина е потребна, заклучува Мицотакис.
Грчкиот премиер оценува дека „нема геополитички проблем“.
„Ова не е прашање за признавање на кој било режим. Станува збор за спасување на луѓе кои се во тешка ситуација и на кои очајно им е потребна нашата помош“, рече функционерот.
Тој смета дека не може безбедно да се тврди дека сирискиот претседател Башар ал Асад ќе дозволи безбедно поминување на таа помош.
„Затоа мислам дека ниту една земја не може сама да преземе такви мерки. Затоа мислам дека е важно овие преговори да се водат или преку Обединетите нации или преку ЕУ, со колективна употреба на ресурси на европско ниво. Не би било безбедно да се одржуваат вакви консултации на билатерално ниво“, заклучи Мицотакис.
Сирискиот министер за надворешни работи Фајсал Мекдад апелираше до европските земји да испратат поголема помош за земјата по разорниот земјотрес, велејќи дека санкциите не се изговор.
– Помошта од Европа не бара барање или администрација, бидејќи хуманитарната помош не подлежи на санкции, така што тие не можат да бидат изговор – рече тој.
– Сите болници во Сирија ги лекуваат жртвите од земјотресот – изјави Мекдад за либанската телевизија Ал Мајаден.
Тој додаде дека Сирија преку своите амбасадори побарала меѓународна помош за справување со последиците од катастрофата.
– Многу земји испратија помош за Сирија и им благодариме на сите лидери кои нѐ контактираа. Сепак, ситуацијата е многу тешка и без разлика на износот на испратената помош, на Сирија и треба повеќе – нагласи тој.
Во 2011 година, Европската унија воведе санкции против сириската влада, обидувајќи се да го собори претседателот Башар ал Асад. Секоја година санкциите се продолжуваат.
Шефот на европската дипломатија Јосеп Борељ изјави, како што пренесува Спутник, дека ЕУ нема да ги укине санкциите за Сирија и нема да помогне во обновата на таа земја додека таму не започне промената на власта.