Кина тврди дека најлошата фаза од нејзината борба против пандемијата „Ковид-19“ поминала, пред очекуваниот најфреквентен ден, кога милиони луѓе патуваат за празникот.
Кинескиот вицепремиер Сун Чунлан, задолжен за одговорот на Кина на Ковид-19, рече дека пандемијата е на релативно ниско ниво, објавија кинеските државни медиуми доцна во четвртокот, откако здравствените власти објавија дека бројот на заболени од коронавирус во болниците достигнал врв.
Но, многумина се скептични во врска со официјалните информации на Пекинг за ковид-19, кои ги преплавија болниците и крематориумите откако строгата политика за нулта ковид беше напуштена минатиот месец.
Некои здравствени експерти сметаат дека над милион луѓе ќе умрат од Ковид во Кина оваа година
Политичкиот пресврт, кој следеше по историските протести против строгиот режим на владата, го ослободи вирусот на 1,4 милијарди луѓе кои главно беа под строг карантин откако се појави во градот Вухан кон крајот на 2019 година.
Некои здравствени експерти веруваат дека повеќе од милион луѓе ќе умрат од оваа болест во Кина оваа година, а британската компанија за здравствени податоци Airfinity предвидува дека бројот на смртни случаи од коронавирусот во најнаселената земја следната недела би можел да достигне 36 илјади дневно.
„Неодамна, целокупната пандемија во земјата е на релативно ниско ниво“, рече Сан во коментарите што ги објави државната новинска агенција Ксинхуа.
„Бројот на критични пациенти во болниците постојано се намалува, иако задачата на спасувачите е сè уште тешка“, додаде таа.
Кинескиот претседател загрижен за приливот на патници во руралните области
Таа го објави ова во пресрет на, како што се очекува, еден од најпрометните денови од почетокот на пандемијата во 2019 година.
Милиони Кинези патуваат во своите градови за лунарната Нова година, која официјално започнува во сабота.
Од 7 јануари до 15 февруари се очекува да се случат околу 2,1 милијарди патувања низ Кина, проценува Министерството за транспорт.
Претседателот Си Џинпинг оваа недела рече дека е загрижен поради приливот на патници во руралните области со слаби здравствени системи и дека заштитата на старите лица, од кои многумина не се целосно вакцинирани, е приоритет.
Кинеското регулаторно тело за интернет оваа недела соопшти дека ќе ги цензурира сите „лажни информации“ за ширење на вирусот што може да предизвика „мрачно“ расположение за време на прославите на Лунарната Нова Година.