Околу 100.000 членови на најголемиот синдикат на медицински сестри во Велика Британија учествуваат во еднодневен штрајк, барајќи подобри плати и работни услови во услови на огромен скок на трошоците за живот.
Медицинските сестри во Велика Британија во четвртокот започнаа штрајк без преседан како дел од нивната борба за подобри плати и работни услови, и покрај предупредувањата на владата дека тоа може да ги стави пациентите во ризик, пишува Дојче веле.
Штрајкот, прв во 106-годишната историја на синдикатот на Кралскиот колеџ за медицински сестри (RCN), доаѓа во време на жесток спор со владата околу платите на Националната здравствена служба (NHS).
Околу 100.000 членови на RCN во Англија, Велс и Северна Ирска одржуваат еднодневен штрајк откако ги отфрлија најновите услови понудени од владата. Итните служби не се вклучени во овој штрајк, велат од синдикатот.
Двете страни остануваат поделени откако телото за ревизија на платите на NHS препорача зголемување на платите за најмалку 1.400 фунти (1.625 евра) над минатогодишното зголемување од три отсто.
Штрајкот на медицинските сестри кој ќе зафати 76 болници и здравствени центри значи откажани илјадници неитни операции и десетици илјади амбулантски прегледи во британското државно финансирано NHS.
Британскиот министер за здравство Стив Баркли го опиша потегот како „многу тажен“, додавајќи дека е „загрижен за ризикот што штрајковите го претставуваат за пациентите“.