Туризмот со години придонесува дури дваесет проценти во грчката економија, а оваа година може да биде рекордна иако отсуствуваат руски туристи.
По дванаесет години финансиска криза, две години од прогласувањето на пандемијата и (досега) шест месеци војна во Украина, луѓето во Грција повторно сакаат да уживаат во безгрижните денови.
Во Грција се надеваат дека туристичката сезона ќе продолжи како што започна.
Грчки туризам и перспективи
Земјата сè уште е во голема мера зависна од туристичката индустрија – во успешните години, оваа индустрија носи повеќе од 20 проценти од бруто националниот производ. И се чини дека 2022 година ќе биде многу успешна.
Министерот за туризам Василис Кикилијас очекува уште повеќе гости отколку во 2019 година, која беше рекордна година, јавува Дојче веле (DW).
Тогаш во Грција на одмор дојдоа вкупно 33 милиони луѓе. Приходите од странски гости изнесуваат 18,2 милијарди евра. Грчката централна банка очекува дека оваа година ќе изнесува 20 милијарди.
Еден милион нови гости неделно
Досегашните бројки се ветувачки: од почетокот на август секоја недела во Грција со авион пристигнувале речиси милион туристи, вели министерот Кикилијас.
Стотици илјади други гости со автомобил пристигнувале на Халкидики и на други места на северот од земјата, од кои повеќето од балканските земји.
Во јули годинава ситуацијата беше слична – со 3,5 милиони странски гости беше многу добар месец.
„Ако продолжи вака до средината на септември, ќе ја преживееме претстојната зима“, вели Панајотис, менаџер на голем бар на Наксос.
Тој остров имаше речиси ист број посетители во јули 2022 година како и во рекордната 2019 година, а август изгледа подобро од тогаш.
Во моментов, таму е речиси невозможно да се најде сместување, исто како на Миконос, Санторини, Крф, Кос или Родос.
Ова во никој случај не се добри цели за патниците кои сакаат спонтано да одат на одмор, без навреме да имаат резервирано сместување.
Од друга страна, на многу грчки острови плажите се многу преполни – исто како и баровите и таверните.
Многумина го сакаат, но и за оние кои бараат мир, има одличен избор на локации на помалку посетените острови, или во ридовите на континентална Грција.
На тоа сега мора да додадеме голема културна понуда: по две години антипандемиски мерки, се одржуваат безброј концерти во античките театри на Епидаур, Додонија или Самотраки, како и во многу амфитеатри на отворено, комедии, трагедии или модерни претстави се изведуваат низ цела Грција.
На многу помали фолклорни фестивали ширум земјата, можете да танцувате со задоволство.
Руси нема, но доаѓаат туристи од други земји
Ниту војната во Украина не го расипа расположението на туристите и домаќините.
Отсуството на туристи од Русија, кои до 2021 година беа многу значајни во региони како Халкидики или Крит, сега го надоместуваат туристи од други земји.
До средината на август, поголемиот дел од гостите во Грција беа Британци, вклучително и познати имиња како Борис Џонсон.
Речиси ист број туристи пристигнаа и од Германија, а потоа следуваат гости од Италија, Франција, Холандија, Швајцарија, Австрија и Полска.
Според податоците на Централната банка, во јуни 2022 година е забележан пораст на посетителите од САД за 50 проценти во однос на 2019 година.
Ова особено ги радува домаќините, бидејќи туристите од САД во просек оставаат повеќе пари од другите.
Нема хаос на аеродромите, нема персонал во хотелите
Најголемите изненадувања на ова туристичко лето во Грција се фактот што нема хаос на аеродромите и тоа што нема доволно персонал во хотелите иако стапката на невработеност е 12 проценти.
Институтот за истражување на туризмот ИНСЕТЕ објави дека секое петто работно место во туристичката индустрија се уште е испразнето.
Причината за тоа се главно лошите услови за работа и сместувањето на персоналот.
Многу Грци сега претпочитаат да бараат работа во странски туристички центри низ Европа, па дури и во Исланд. Оти таму се подобро платени и сместени отколку дома.