Најмалку 20 луѓе ги загубија животите во поплавите во централен Авганистан во изминатите 48 часа, соопшти денеска Управата за управување со природни катастрофи, додека обилните врнежи уништија неколку илјади домови и уништија земјоделски добра.
Земјата оваа година се соочува со природни катастрофи, вклучувајќи големи суши и силен земјотрес од јуни, во кој загинаа повеќе од 1.000 луѓе.
Портпаролот на авганистанската управа за управување со природни катастрофи, Мохамад Насим Хакани, изјави дека 20 лица загинале, а 35 се повредени поради поплавите во провинцијата Логар, пренесе Ројтерс.
Неофицијалните извештаи укажуваат дека бројот на жртвите е многу поголем, додава британската новинска агенција.
Талибанската влада, која ја презеде власта минатиот август, се бореше да се справи со катастрофите и побара помош од меѓународната заедница.
„Бараме од меѓународната заедница, особено од исламските земји, како и од хуманитарните организации, веднаш да им помогнат на жртвите“, рече портпаролот на талибанската влада Забихула Муџахид.