Откако агентите ја пребарале неговата вила во Мар-а-Лаго, Флорида и од неа зеле 11 пакети документи, се поставува прашањето дали поранешниот претседател Доналд Трамп може кривично да одговара за земање доверливи документи со себе.
Сите хартии што ги има претседателот за време на неговиот мандат во Белата куќа треба да бидат предадени на Националниот архив во Вашингтон, кој ги чува – што не беше случај со Трамп.
Што се знае за истрагата?
Познато е дека агентите на ФБИ одзеле 11 пакети со доверливи документи, од кои некои се означени како „строго доверливи“, според налогот за претрес издаден од судот на Флорида по интервенцијата на Министерството за правда.
Агентите на ФБИ, меѓу другото, барале документи поврзани со нуклеарно оружје, објави Вашингтон пост.
Трамп тоа го нарече „лаги“ и на својата социјална мрежа напиша дека соработува со властите и дека „упадот“ е политички мотивиран.
Тој дури рече дека ФБИ подметнал докази против него.
Кои закони потенцијално ги прекршил Трамп?
Наредбата за претрес издадена од обвинителот укажува дека се прекршени три закони.
Документите што ФБИ му ги зеде на Трамп биле означени како „доверливи“, а овие закони се однесуваат на третманот на таквите чувствителни документи и нивната можна злоупотреба
Законот бр. 793 забранува неовластено поседување информации за националната одбрана, без разлика дали се работи за класифицирани документи.
Казната за непочитување на овој закон е до 10 години затвор.
Два други закони, 2071 и 1519 го прават незаконски да се сокрие или уништи официјални американски документи.
За овие дела е предвидена казна затвор од 20 години.
Ниту еден од горенаведените закони не прави разлика помеѓу доверливи и јавни документи.
Дали има разлика дали документите се класифицирани или не?
Федералниот закон забранува носење доверливи документи на неовластено место, но тој закон не беше основа за налогот за претрес.
Тоа значи дека дали документите се доверливи нема да биде пресудно за евентуалното поднесување обвинителен акт.
Во 2018 година, Трамп потпиша измени во законот со кои се зголеми затворската казна за оние кои неправилно ракуваат со доверливи документи од една на пет години затвор.
Самиот претседател има право да ги декласифицира документите, а постои можност Трамп да го направил тоа пред да ги однел во Мар-а-Лаго.
Сè е декласифицирано“, напиша Трамп на својата социјална мрежа
Сепак, и тој процес на отстранување на ознаката за доверливост од документи бара одредена процедура, што не е сигурно дека се случило во случајот на Трамп.
Сè поголем број републиканци го повикаа ФБИ во неделата да објави писмена изјава во која ќе покаже зошто верува дека е оправдано запленувањето на документите од Мар-а-Лаго.
Републиканците бараат да се објават подетални информации за тоа зошто федералниот судија на прво место издал таков налог за претрес.
Објавувањето на писмени изјави на ФБИ е невообичаено и ретко и ќе бара одобрение од федерален судија.