Русија вети дека ќе ги прошири своите „обемни и конструктивни“ билатерални односи со Северна Кореја, рече Владимир Путин.
Како што пренесува Би-Би-Си, во писмото што Путин му го испратил на севернокорејскиот лидер Ким Џонг Ун по повод Денот на ослободувањето што го слави Пјонгјанг, рускиот лидер рекол дека тој потег е во интерес на двете земји.
Ким Џонг Ун рече дека пријателството меѓу Русија и Северна Кореја се зацврсти во Втората светска војна, со победата над Јапонија.
Тој додаде дека нивната соработка само ќе расте и зајакнува.
Според севернокорејските медиуми, Ун додаде дека „стратешката и тактичката соработка, како и поддршката и солидарноста“ меѓу Москва и Пјонгјанг достигнаа ново ниво, на „заедничкиот фронт против воените закани и провокации на непријателските сили“.
Иако не е прецизирано за кои непријателски сили се мисли, терминот постојано се користи во Пјонгјанг за да се однесува на САД и нивните сојузници.