Нетфликс и Мајкрософт одлучиле да се здружат за да понудат поевтин план за претплата на корисниците на кои ќе им се сервираат реклами.
Нетфликс соопшти дека го избрал Мајкрософт за свој партнер за глобална рекламна технологија и продажба за да воведе „план за претплата со пониска цена што вклучува реклами“.
„Мајкрософт има докажана способност да ги поддржи сите наши потреби за рекламирање додека работиме заедно за да изградиме нова понуда поддржана од реклами“, рече главниот оперативен директор на Нетфликс, Грег Питерс во соопштението.
Гигантот за стриминг вели дека услугата ќе биде „додаток“ на неговите постоечки планови, кои не вклучуваат реклами, пренесува Би-Би-Си.
Во април, акциите на Нетфликс паднаа откако компанијата ја пријави првата загуба на претплатници по повеќе од една деценија.
Минатиот месец, ко-извршниот директор Тед Сарандос рече дека компанијата е во разговори со други бизниси за да изнајдат начини да се привлечат до ценовно чувствителна публика.
Нетфликс никогаш не сакал реклами, а целиот негов бизнис модел е изграден околу месечни претплати.
Сепак, директорите мораа да ги променат правилата. Компанијата губи претплатници, а поради кризата во светот домаќинствата сметаат дека откажувањето на претплатата е заштеда. Затоа создадоа поевтина услуга – со реклами – за која велат дека ќе биде воведена подоцна оваа година.