Поради екстремните временски услови во последниве години, некои делови на Германија повеќе нема да бидат погодни за населување луѓе, изјави Ралф Тиеслер, директор на Федералната служба за цивилна заштита и заштита од катастрофи, пренесува агенцијата Хина.
„Како човек на врвот на канцеларијата за заштита на граѓаните и борба против катастрофи, морам да кажам дека одредени области повеќе нема да бидат погодни за живеење поради климатските промени и акутната опасност од природни катастрофи“, рече тој пред презентацијата на годишниот извештај за цивилна заштита.
Тој посебно предупреди за бреговите на реката Ахр, кои пред една година предизвикаа поплави во западна Германија во кои животот го загубија повеќе од 180 луѓе.
Тајслер рече дека дури и одредени области на германскиот брег на Северното Море повеќе не се безбедни за населување.
Климатска промена
Сега е „крајно време“ да се воспостави концепт во борбата против ефектите од климатските промени, рече тој.
На заедничката медиумска конференција со министерката за внатрешни работи Ненси Фезер, тој побара посилно вклучување на граѓаните во процесите на цивилна заштита, особено во однос на претстојната зима и евентуалниот недостиг на гас.
„Се подготвуваме за тешка зима со недостиг на гас и нов бран на коронавирусот и би бил среќен доколку сите размислат што можеме сами да направиме за подобро да се подготвиме за кризи“, рече Тајслер.
Тој додаде дека размислува за складирање на неопходните залихи, како и за алтернативни извори на енергија.