Иранската разузнавачка агенција на Револуционерната гарда објави дека го уапсила заменик-амбасадорот на Велика Британија во Иран под обвинение за шпионажа.
Според новинската агенција Ројтерс, дипломатот е еден од неколкуте странци уапсени од иранската Револуционерна гарда.
Меѓу приведените е и вториот највисок британски пратеник во Техеран, за наводни акти на шпионажа, како земање примероци од почвата во забранети области, објави иранската државна телевизија.
„Овие шпиони земаа примероци од почвата во централната пустина на Иран, каде што беа спроведени воздушни ракетни вежби на Револуционерната гарда“, соопшти иранската државна телевизија.
Не е прецизирано кој е уапсениот Британец, но според веб-страницата на Министерството за надворешни работи на Велика Британија, заменик-шеф на мисијата е Гилс Витакер, кој ја презеде функцијата во ноември 2018 година.
Според иранската државна телевизија, меѓу уапсените има државјани на Австрија и Полска.