Литванските ограничувања за транзит на руски цемент и метал во Калининградската област се најкритични за економијата на овој регион, изјави гувернерот на Калининградската област Антон Алиханов во интервју за весникот Ведомости.
„Цементот е најголемиот предизвик за нас во моментов. И металите. Уште во пролетта почнавме да трпиме прекини во снабдувањето со цемент, бидејќи Европејците иницираа санкции против лизинг компаниите кои изнајмуваат железнички вагони за транспорт на цемент. Недостигот од цемент траеше три недели, а потоа ги заменивме тие компании и воспоставивме испораки“, рече Алиханов, пренесува Тас.
Тој додаде дека забраната за транзит на ваква стока ја смета за блокада.
„Ова веројатно не се смета за блокада во целосна смисла на зборот, но кога ви забрануваат да увезувате градежен материјал и поради тоа поскапува поморскиот транспорт, тогаш сигурно е блокада“, рече Алиханов.
Тој напоменува дека е точно дека забраната не го опфаќа превозот на прехранбени производи, но дека без цемент не може да се градат ниту училишта, ниту болници.
„Со други зборови, станува збор за нормална егзистенција на повеќе од милион луѓе и за економијата на нашиот регион. Затоа, ваквите чекори се дефинитивно исклучително штетни и во блиска иднина мора да се стави крај на овие проблеми“, рече гувернерот.
Како дел од санкциите, Литванија претходно го суспендираше железничкиот и патниот транзит на стоки од руските региони до Калининградската област.
Руското Министерство за надворешни работи и Кремљ објавија дека дејствијата на Литванија се незаконски и спротивни на меѓународните договори, додаде Тас.