Градските власти на Хамбург ќе воведат контролирана дистрибуција на топла вода за приватните домаќинства и ограничување на максималната температура за греење на становите, во случај на акутен недостиг на гас, изјави денеска локален претставник задолжен за животна средина.
Откако Русија го прекина снабдувањето со гас преку гасоводот Северен тек 1, германската влада минатиот месец го активира второто од трите нивоа на итни мерки во случај на недостиг на гас, а третото ниво воведува ограничувања за потрошувачката на горива, објави Ројтерс.
Германската влада апелираше до граѓаните и компаниите да ја намалат потрошувачката на енергија и да помогнат да се наполнат складиштата и да се соберат резерви на гас до зима, додека германските градови размислуваат да воведат дополнителни мерки во случај на недостиг на гас.
„Во случај на акутен недостиг на гас, топла вода може да биде достапна само во одредени периоди од денот, во итни случаи“, рече Јенс Керстан, функционер за животна средина во Хамбург, според весникот „Велт ам Зонтаг“.
Керстан рече дека градот може да размисли и за општо намалување на максималната собна температура во мрежата за топла вода, а според федералниот план за итни случаи, домаќинствата и критичните институции како што се болниците во третото ниво на мерки предвидени во планот за итни случаи ќе имаат индустриски приоритет, иако можеби нема да биде возможно во цел Хамбург од технички причини.
Додека Германија се обидува да најде алтернативни патишта за снабдување со гас што е можно поскоро, Керстан предупреди дека привремениот терминал за течен природен гас (LNG) во Хамбург ќе биде оперативен најрано до средината на следната година.
„Во текот на јули ќе знаеме дали и на која локација е можно да се воспостави привремен терминал за ЛНГ за Хамбург“, рече тој.