Европската унија денеска постигна начелен договор за Директивата за соодветна минимална плата, која, истовремено почитувајќи ги националните надлежности, обезбедува заедничка правна рамка, промовира колективно договарање и го подобрува пристапот на работниците до заштитата на минималната плата во сите ЕУ-27.
Европската комисија, која ја предложи оваа правна рамка во октомври 2020 година, го поздрави денешниот политички договор меѓу Европскиот парламент и Советот на ЕУ, додавајќи дека тоа е „фундаментален чекор кон заштитата на правата на работниците во ЕУ“ и дека соодветните минимални плати се важни да се зајакне социјалната правда и да се поддржи одржливо и инклузивно економско закрепнување.
„Новите правила за минимална плата ќе го заштитат достоинството на работата и ќе обезбедат трудот да се исплати. Сето тоа ќе се направи со целосно почитување на националната традиција и автономијата на социјалните партнери“, изјави претседателката на Европската комисија Урсула фон дер Лајен.
Законски минимални плати моментално постојат во 21 земја-членка на ЕУ, а минималната плата во 13 земји во јануари годинава е под 1.000 евра.
Според податоците на Евростат, најниска минимална плата имаат Бугарите – 332 евра, а Луксембуржаните највисока – 2.257 евра.
Новата Директива дава јасни критериуми за одредување на минималната плата, вклучувајќи ја куповната моќ, распределбата на трошоците за живот и стапката на раст на платите и националната продуктивност.
Планирано е и редовно ажурирање на минималната плата, формирање консултативни тела во кои ќе можат да учествуваат социјалните партнери, како и варијациите и одбивањата на законските минимални плати ги почитуваат принципите на недискриминација и пропорционалност.
Директивата го промовира и олеснува колективното договарање и ги повикува земјите-членки, каде што опфатот на колективното договарање е помал од 80 проценти, да воспостават акционен план за промовирање на колективното договарање.
Кога станува збор за следење и заштита на минималната плата, земјите-членки се обврзуваат да собираат податоци за покриеноста и адекватноста на минималната плата, како и да обезбедат работниците да имаат пристап до споровите и да имаат право на компензација.
Брисел наведува дека Директивата за соодветна минимална плата ќе стапи на сила 20 дена по нејзиното објавување во Службениот весник на ЕУ, а земјите-членки ќе имаат рок од две години да ги пренесат новите законодавни елементи во националното законодавство.