Пожарникарите од Њу Делхи се борат со пожарот што избувна пред три дена на огромна депонија во главниот град на Индија, додека северот на земјата беше погоден од топлотен бран.
Метеоролозите најавија дека температурата во Делхи во четврток може да се искачи до 46 Целзиусови степени. Властите издадоа предупредување и ги советуваа ранливите луѓе да останат во затворен простор.
Во четвртокот наутро, четири бригади со околу триесетина пожарникари сè уште го гаснеа пожарот во тешко пристапниот дел од депонијата, на третиот ден од пожарот, изјавија за АФП од противпожарната бригада на главниот град, додавајќи дека пожарот може да се локализира до петок. Засега нема информации за жртви, а властите ги истражуваат причините за пожарот.
Планината ѓубре што гори е висока 60 метри и од неа се издига густ чад што го влошува атмосферското загадување.
Метропола со повеќе од 20 милиони жители нема модерна инфраструктура за отстранување на 12.000 тони отпад што го произведува секој ден.