Серија експлозии се слушнале во раните утрински часови во три руски провинции кои се граничат со Украина, соопштија руските власти, а речиси во исто време се запалило складиште за муниција во провинцијата Белгород, пренесува Ројтерс.
Регионалниот гувернер на Белгород, Вјачеслав Гладков, изјави дека пожарот во магацинот за муниција кај селото Стара Нелидовка е изгаснат и дека нема повредени цивили.
Русија овој месец ја обвини Украина дека со хеликоптери нападнала складиште за гориво во Белгород и отвори оган врз неколку села во покраината.
Покраината Белгород се граничи со украинските региони Луганск, Суми и Харков, каде што се водат тешки борби откако Русија ја нападна Украина пред два месеци, потсетува Радио Слободна Европа (РСЕ).
Во исто време, Роман Старовоит, гувернер на руската провинција Курск, која исто така се граничи со Украина, изјави дека во средата рано во градот Курск се слушнале експлозии, кои најверојатно биле звуци на рушење на системот за противвоздушна одбрана.
Во Воронеж, административен центар на друга провинција која се наоѓа веднаш до Украина, руската агенција ТАСС цитираше претставник на Министерството за вонредни ситуации, кој изјави дека се слушнале две експлозии и дека властите спроведуваат истрага.