Руската армија е пред портите на украинскиот град Херсон, на југот на земјата, изјави во вторникот градоначалникот на тој град.
„На влезовите во Керсон руската армија постави контролни пунктови. Тешко е да се каже како ќе се развива ситуацијата“, напиша на Фејсбук Игор Коликаев, градоначалник на Херсон.
Тој додаде дека Херсон е украински град и така ќе остане.„Херсон ќе се спротивстави!“ напиша тој.
„Јас сум во мојата канцеларија за да ги координираме службите за да можете да се разбудите во релативно тивок град“, додаде тој, барајќи од жителите да останат смирени и претпазливи и да не излегуваат за време на полициски час.
„Не водете агресивни разговори со никого и не предизвикувајте конфликти со вашите неистомисленици… Ова не е битка, ова е војна. А војната се добива со разумни постапки и ладни глави“, заклучи тој.
На социјалните мрежи, видеата покажуваат како руските сили влегуваат во градот, кој има 290.000 жители.
Русија во четвртокот започна инвазија на Украина.
Во текот на ноќта продолжија руските напади и врз источниот украински Харков и врз главниот град Киев, додека двете страни претрпеа загуби во нападот на североисточниот регион Суми.
Регионалниот гувернер рече дека 70 украински војници биле убиени кога Русите бомбардирале воена база во градот Охтирка во регионот Суми.
Според снимките на американската сателитска компанија Максар, руски воен конвој кој се протега преку 60 километри се приближува до главниот град Киев, кој се уште е под контрола на украинската армија.