Советникот од кабинетот на украинскиот претседател Михаил Подољак изјави дека преговорите меѓу Русија и Украина продолжуваат.
Тој на Твитер објави дека наскоро ќе започне третиот круг, пренесува руски Тасс.
Претходно советникот на министерот за внатрешни работи од Киев, Антон Герашченко изјави дека разговорите меѓу двете страни за украинско-белоруската граница се завршени.
„Преговорите меѓу украинската и руската делегација продолжуваат. Третото коло ќе започне за неколку минути“, напиша Подољак на Твитер.
Переговори між українською та російською делегаціями тривають. За кілька хвилин розпочнеться третій раунд.
— Михайло Подоляк (@Podolyak_M) February 28, 2022
„Преговорите меѓу Украина и Русија се завршени“, напиша претходно Герашченко на својот профил на Телеграм, пренесе украински Интерфакс.
Како што беше соопштено од кабинетот на претседателот на Украина пред почетокот на разговорите, делегацијата од Киев ќе побара „итно“ прекин на огнот и повлекување на руските војници.
„Клучното прашање е итен прекин на огнот и повлекување на војниците од украинска територија“, се вели во соопштението.
Белорускиот министер за надворешни работи Владимир Макеи ги пречека делегациите на двете земји, уверувајќи ги дека треба да се чувствуваат „целосно безбедно“.
„Почитувани пријатели, претседателот на Белорусија ме замоли да ви посакам добредојде и да обезбедам сè за вашата работа, како што е договорено со претседателот Зеленски и претседателот Путин. Можете овде да се чувствувате сосема безбедно. Тоа е наша света должност“, рече Макеи
„Претседателот Лукашенко искрено се надева дека во текот на денешните разговори ќе биде можно да се најдат решенија за сите прашања од оваа криза. Сите Белоруси се молат за ова. Сите предлози, во однос на организирање на денешниот состанок, ќе бидат разгледани и апсолутно исполнети“, додаде тој, нагласувајќи дека со нетрпение ги очекува резултатите.
Во украинската делегација, меѓу другите, беа и министерот за одбрана Олексеј Резников и советникот на претседателот Михајло Подољак.
Пред почетокот на преговорите, Москва рече дека сака да постигне „договор“, додека нејзината офанзива се чинеше дека наиде на поголем отпор од очекуваното.
„Секој час додека се одолговлекува конфликтот, умираат украински граѓани и војници. Се договоривме дека треба да постигнеме договор, но тоа мора да биде во интерес на двете страни“, изјави рускиот преговарач и советник во Кремљ, Владимир Медински.