Италија мора помалку да се потпира на увозот на гас од Русија, изјави во петокот премиерот Марио Драги, најавувајќи зголемен увоз на течен гас од САД и предупредувајќи за намаленото домашно производство.
„Настаните овие денови покажуваат дека бевме несовесни бидејќи не ги проширивме нашите извори на енергија и снабдувачи во изминатите децении“, рече Драги во парламентот.
Рускиот удел во увозот на италијански гас е 45 отсто додека домашното производство е намалено, нагласи италијанскиот премиер.
Италија планира да го зголеми увозот на течен природен гас од САД, рече Драги, заблагодарувајќи му се на американскиот претседател Џо Бајден за помошта.
Рим, исто така, бара да го зголеми увозот од Азербејџан, Алжир, Тунис и Либија, додаде тој.
Италијанската енергетска компанија Ени минатата недела објави дека сè уште има резерви на природен гас во својата земја и е подготвена да го зголеми производството доколку е потребно.
Драги смета дека капацитетите за складирање гас треба да се подобрат и ја повика Европската унија да развие заеднички механизми за складирање.
Тој, исто така, предупреди дека можеби ќе треба повторно да ги отворат електраните на јаглен за да ги решат краткорочните проблеми со снабдувањето и да го ублажат влијанието на зголемените цени на енергијата врз домаќинствата и бизнисите.
Владата минатата недела одобри шест милијарди евра помош за потрошувачите и компаниите кои се борат со високите сметки за енергија, како дел од осум милијарди евра за поддршка на економијата, потсетува Ројтерс.