Во поплавите и одроните предизвикани од обилните дождови во бразилскиот град Петрополис загинаа 165 лица, соопштија синоќа властите.
Најмалку уште две лица загинаа во новото невреме, известија итните служби на бразилската држава Еспирито Санто, која граничи со државата Рио де Жанеиро, каде што се наоѓа Петрополис.
Едно лице загина при уривање на ѕид во градот Алегре, а друго било однесено од вода додека се обидувало да извлече автомобил во градот Нова Венеција, соопштија властите.
Спасувачите и локалното население во потрага по нивните исчезнати роднини продолжуваат да копаат низ кал и урнатини во Петрополис, град со 300.000 жители на југозападот на земјата, кој бразилскиот претседател Жаир Болсонаро го опиша како воена зона.
Бројот на исчезнати е намален бидејќи телата се идентификувани, а семејствата ги наоѓаат своите најблиски живи, соопшти полицијата, но конечниот растечки број на жртви останува неизвесен.
Властите, сепак, рекоа дека е малку веројатно некој друг кој преживеал да биде извлечен од урнатините и насобраната кал.
Досега се идентификувани 124 тела, од кои 28 се деца, а дополнително 1.200 лица морале да ги напуштат своите домови.
Силно невреме го погоди Петрополис, град на 60 километри северно од Рио де Жанеиро, во вторникот минатата недела.
Во вторникот дождовите ги претворија улиците на туристичкиот град во порои од кал и предизвикаа лизгање на земјиштето.
Петрополис, поранешната летна резиденција на царскиот двор на Бразил во 19 век, имала повеќе врнежи од просекот за целиот месец февруари.
Градските служби веќе пронајдоа повеќе од 300 возила пренесени со вода низ градот, блокирајќи улици и тротоари или потопени во реки.