Ова е интересен феномен во Америка. Од Њујорк преку Лос Анџелес до Мајами и Чикаго, кражбите на членовите на оваа ценета раса се во пораст.
Тие се мали и пријателски и лесни за држење, па француските булдози станаа исклучително популарни и се продаваат на црниот пазар за илјадници долари.
Во исто време тие се уште поатрактивни бидејќи се познати како „славни кучиња“.
Најпозната жртва досега беше пејачката и актерка Лејди Гага. Вооружени крадци ги украле нејзините миленици, француските булдози Коџи и Густаво минатата година, па дури и отвориле оган врз асистентката на Гага која ги шетала. Била ранетa, но преживеала.
Пејачката понудила награда од 500.000 долари на оние кои ќе и ги вратат милениците, што се исплатело, а полицијата во случајот уапсила пет лица.
Па, зошто француските булдози се толку примамлива цел за крадците?
Постојат две клучни причини: нивната висока препродажна вредност од 3.500 до 5.000 долари или повеќе, и фактот дека тие се релативно ретка раса, изјави за AFP Бренди Хантер Мунден, потпретседател на Американскиот кинолошки клуб.
„Ова не е раса што има големи легла и потребно е долго време за да може воопшто да се купи француски булдог. Зголемувањето на нивната популарност резултираше и со зголемување на кражбите. Но, прибегнувањето кон насилство е нешто ново и загрижувачко“, рече Мунден.
Меѓу многуте познати личности – актери, спортисти, музичари, модели и инфлуенсери кои имаат француски булдог се Рис Витерспун, Хју Џекман, Криси Тајген, Леонардо ди Каприо, Мадона, Снуп Дог, Мајкл Фелпс и Хилари Даф.
Затоа, не е изненадување што Холивуд штотуку стана мека кражба на француски булдози.