Генералниот секретар на ОН Антонио Гутереш во средата рече дека затворањето на границите поради омикрон сојот на коронавирусот е „длабоко неправедно, казнувачко и неефикасно“, нарекувајќи го форма на апартхејд кон Африка.
„Со вирус кој не познава граници, ограничувањата за патување што изолираат една земја или регион не само што се длабоко неправедни и казнувачки, туку се и неефикасни“, им рече тој на новинарите, додавајќи дека смета дека е „скандалозно“ да се осуди Африка затоа што не била вакцинирана.
Осврнувајќи се на Јужна Африка, која сигнализираше појава на варијантата омикрон на 24 ноември, што ги наведе другите земји да ги затворат границите за своите граѓани, шефот на ОН рече дека земјите не треба да бидат „колективно казнети за идентификување и споделување клучни научни и епидемиолошки информации со светот.”
Тоа е „неправедно“ и „неморално“, повтори тој.
„Значи, упатувам силен апел, апел до разумот. Имаме инструменти за безбедно патување. Ги користиме тие инструменти за да го избегнеме видот на апартхејдот што го сметам за неприфатлив“, нагласи тој.
Африка нема доволно вакцини за своето население, ги нема потребните финансиски ресурси за закрепнување на економијата, ги трпи најтешките последици од климатските промени, иако не придонесе и ги нема потребните ресурси за да изгради отпорност, соопштигенералниот секретар на Обединетите нации.
Застанувајќи покрај него, претседателот на Комисијата на Африканската унија Муса Факи Махамат, исто така, го осуди стигматизирањето, нагласувајќи дека „помалку од 6 отсто од Африканците се вакцинирани“, повикувајќи на меѓународна солидарност.
„Ги повикувам владите да претпочитаат да ги земат предвид тестовите за патници, како и други соодветни и навистина ефективни мерки“, додаде Гутереш.
Тоа го нарече единствениот начин да се намали ризикот од пренос додека се овозможува патување.
Новата варијанта на коронавирусот наречена омикрон е веќе откриена на сите континенти, но Европа се чини дека е најтешко погодена и почна, како и другите земји во светот, да ги заострува мерките и да воведува гранични контроли и да ги забранува патниците од јужна Африка.