Во нивното природно живеалиште, на островот Комодо и на неколку соседни острови во источна Индонезија, живеат големи гуштери, кои поради нивната големина и агресивно однесување ги следат бројни митови и легенди уште од античко време.
Индонезиската зоолошка градина успешно одгледува комодо змејови, во обид да го спаси најголемиот гуштер на светот од истребување, за кој климатските промени претставуваат дополнителна опасност.
Младите гуштери лазат по чаталестите јазици провлекувајќи се низ оградената зоолошка градина во градот Сурабаја. Некои се борат за женки, додека други бараат плен во барата, пишува Хина.
Некои митолошки експерти веруваат дека овој вид гуштери послужил како инспирација за приказните за митолошки змејови кои плукаат оган и киднапираат принцези и дека сите средновековни приказни за змејови всушност потекнуваат од островот Комодо.
Бидејќи кинеските морнари пловеле по водите на денешна Индонезија во античко време, тие донеле приказни од нивните патувања за големи ѕверови кои подоцна биле преземени и веројатно преувеличени од арапските трговци, а преку нив и од остатокот од светот.
Во септември, Меѓународната унија за зачувување на природата го вклучи змејот Комодо на Црвената листа на загрозени видови, наведувајќи ја зголемената закана за нивното постоење од климатските промени.
Глобалната температура и порастот на нивото на морето се очекува да ги намалат соодветните живеалишта за змејовите Комодо за најмалку 30 отсто во следните 45 години, предупредија експертите.
Вработените во зоолошката градина Сурабаја се надеваат дека нивните напори да го спасат овој вид гуштери ќе го привлечат вниманието на светските лидери собрани на самитот во Глазгов и ќе ги охрабрат да преземат најбрзи можни чекори во борбата против климатските промени.
Од започнувањето на програмата за одгледување гуштери, зоолошката градина ја зголемила својата популација на 108 возрасни и 35 младенчиња, а во моментов има уште 40 јајца во фаза на инкубација.
Чувар во зоолошката градина Рукин им рекол на новинарите дека температурата и влажноста мора да бидат оптимални за парење на овие големи животни. Тој додаде дека се надева оти змејовите одгледани во заробеништво би можеле да се вратат во дивината.
„Се надевам дека ќе можеме да ги одгледуваме и дека со овој проект ќе се погрижиме идните генерации да имаат можност да ги видат во реалниот живот, а не само на слики“, рече тој.