По неколку часовно исклучување на најпопуларната социјална мрежа „Фејсбук“, како и Инстаграм и апликацијата Воцап, услугите на платформата повторно почнаа да работат точно на полноќ, а шефот на компанијата, Марк Закерберг, се извини за прекинот.
„Фејсбук, Инстаграм, Воцап и Месинџер се враќаат на интернет“, рече тој во објавата на Фејсбук.
„Извинете за денешниот прекин – знам колку се потпирате на нашите услуги за да останете поврзани со луѓето за кои се грижите“, рече Закерберг, пренесе Ndtv.com.
Извинување дојде и од „Воцап“.
„Извинување до сите што не можеа да користат Воцап денес“, беше наведено на „Твитер“ во вторникот рано наутро.
„Почнуваме полека и внимателно да го враќаме Воцап во функција. Ви благодариме многу за трпението. Ќе продолжиме да ве известуваме кога имаме повеќе информации за споделување“.
„Најголемиот прекин досега“
Порталот „Даундетектор“, кој ги следи извештаите за прекини на интернет, објави дека прекинот во работата на „Фејсбук“ е „најголемиот што некогаш го виделе“, објави Ndtv.com.
„Прекинувањето на Фејсбук продолжува и стана најголемиот што го видовме на Даундетектор со над 19,6 милиони извештаи за проблемот од сите страни на светот“, се вели во објавата на компанијата во понеделникот.
Соединетите Американски Држави водат по бројот на пријавени прекини со над 1,7 милиони, потоа Германија – 1,3 милиони – и Холандија – 915,000.
Грешка при промена на конфигурацијата
Фејсбук ја обвини „погрешната промена на конфигурацијата“ за речиси шест часа застој, што спречи 3,5 милијарди корисници на компанијата да пристапат до социјалните мрежи, како и до услугите за пораки како Инстаграм, Воцап и Месинџер.
„Сакаме да појасниме дека во овој момент веруваме дека причината за овој прекин во работата е погрешна промена на конфигурацијата“, објави Фејсбук на блогот.
Компанијата денеска не наведе на блогот како настанала промената на конфигурацијата и дали била планирана, а неколкумина вработени во Фејсбук кои одбија да го откријат својот идентитет, претходно за Ројтерс изјавија дека веруваат дека прекинот е предизвикан од внатрешна грешка во начинот на кој сообраќајот на интернет насочени кон неговите системи.
Можна е саботажа
Експертите за безбедност потврдија дека ненамерната грешка или саботажа е можно објаснување за прекинот.
Како што светот се префрли на конкурентните апликации како што се Твитер и ТикТок, акциите на Фејсбук паднаа за 4,9 проценти, што е нивниот најголем дневен пад од ноември минатата година и пораснаа околу половина процент по продолжувањето на услугите.
Фејсбук, кој е најголемиот светски продавач на огласи преку интернет по Гугл, загуби околу 545.000 долари од овој приход во САД за време на прекинот, според проценките на агенцијата за Стандардниот индекс на медиуми.