Светската банка ја суспендираше финансиската помош за Авганистан поради загриженост за судбината на жените под режимот на Талибанците.
„Ние сме длабоко загрижени за ситуацијата во Авганистан и нејзиното влијание врз изгледите за развој на земјата, особено во однос на правата на жените“, рече портпаролката на Светска банка, Марсела Санчез-Бендер.
Според информациите од веб – страницата на Светска банка, таа институција одвоила повеќе од 5,3 милијарди долари за развојни проекти во Авганистан, а Фондот за доверба за обнова на Авганистан, со кој раководи Светска банка, собрал повеќе од 12,9 милијарди.
„Ги суспендиравме плаќањата за нашите операции во Авганистан и внимателно ја следиме и оценуваме ситуацијата во согласност со нашите внатрешни политики и процедури“, додаде Санчез-Бендер, пренесува Си-Ен-Ен.
Светската банка соопшти дека ќе ги продолжи консултациите со меѓународната заедница и развојните партнери.
– Заедно со нашите партнери, бараме начини да останеме вклучени во зачувувањето на тешко постигнатите успеси во развојот и да продолжиме да ги поддржуваме луѓето во Авганистан- заклучи Санчез-Бендер.