Во силните поплави што погодија делови на американската сојузна држава Тенеси загинаа најмалку 21 лице, додека 50 се трага, соопштија властите во неделата.
Властите го потврдија бројот на загинати и исчезнати и рекоа дека вршат претреси од куќа до куќа во погодената област.
Рекордни врнежи до 43 сантиметри во некои области предизвикаа големи поплави во саботата попладне и навечер. Градот Вејверли, недалеку од главниот град Нешвил, беше особено тешко погоден. Стотици куќи беа уништени.
Градоначалникот на Вејверли Валас Фрејзер за локалните медиуми изјави дека загинатите во поплавите биле од различна возраст, од бебиња до постари лица.
„Вашингтон пост“, повикувајќи се на членови на семејството, објави дека во поплавата загинале и седуммесечни близнаци.
Катастрофалната поплава откорна масивни дрвја, ги зафати куќите додека автомобилите и камионите завршија во ровови и настрешници и други згради.