Компанијата „Вирџин галактик“ на милијардерот Ричард Брансон го објави својот пробен туристички лет во вселената за 11 јули, кој има намера да ги престигне Џеф Безос и неговата „Blue Origin“, чиј лет е закажан за 20 јули.
Брансон ќе биде меѓу шесте патници во ракета со крилја што ќе полета од наменски изграден комерцијален космодром во американската сојузна држава Ново Мексико, пренесуваат светските медиуми.
Милјардерот има намера да започне да го развива вселенскиот туризам оваа година, а повеќе од 600 луѓе, вклучително и многу познати личности како Џастин Бибер и Леонардо ди Каприо, веќе платија и резервираа место.
Датумот на полетување беше објавен само еден ден откако „Blue Origin“ на Безос објави дека почесен гостин на летот на ракетата „Њу Шепард“ на 20 јули ќе биде 82-годишната Воли Фанк, која беше меѓу таканаречени жени од програмата Меркур 13, кои во шеесетите години на минатиот век поминале обука за астронаути, но никогаш не одлетале во вселената затоа што биле жени.
Фанк ќе стане најстарата личност која летала во вселената, надминувајќи го покојниот Џон Глен, кој постави рекорд на 77-годишна возраст кога леташе со вселенскиот шатл „Дискавери“ во 1998 година.
Заедно со Безос, неговиот брат Марко и победникот на добротворната аукција во која беше продаден билетот за овој лет, таа ќе биде првата патничка во леталото „Њу Шепард“.
Датумот 20 јули се совпаѓа со прославата на 52-годишнината од слетувањето на мисијата „Аполо 11“ на површината на Месечината.
Во трка за развој на вселенскиот туризам е и компанијата „Спејс Икс“ од Илон Маск, која планира со ракетата „Старшип“ да пренесе патници на Месечината и Марс.
