Светската здравствена организација (СЗО) објави дека кинеската вакцина Синофарм против ковид-19 е одобрена за итна употреба, пренесува АП, наведувајќи дека ова отвора пат за милиони дози да стигнат до најсиромашните земји.
Одобрение за итни случаи е специјално овластување за употреба на одредено медицинско помагало, кое се издава во итни ситуации, за време на итни случаи во јавното здравство, со цел тој медицински уред да биде достапен што е можно побрзо за луѓето на кои им е потребно.
Вакцината, една од двете кинески вакцини што веќе се дадени на стотици милиони луѓе во Кина и во странство, е исто така и првата вакцина за коронавирус одобрена од СЗО, која не е развиена на Запад, пренесува Ројтерс.
Одлуката на советничката група на СЗО отвора можност вакцината Синофарм да биде вклучена во програмата Ковакс, која е поддржана од Обединетите нации, во следните недели или месеци, како и да се дистрибуира преку УНИЦЕФ и регионалната канцеларија на СЗО во Америка, додава АП.
„Попладнево, СЗО ја стави вакцината на Пекинг против ковид-19 на списокот за итна употреба, со што стана шеста вакцина што доби валидација на СЗО за безбедност, ефикасност и квалитет“, рече генералниот директор на СЗО Тедрос Аданом Гебрејезус. „Ова го проширува списокот на вакцини што COVAX може да ги купи и ова им дава доверба на државите да го забрзаат одобрувањето на нивните регулаторни тела и да увезат и да ја дадат вакцината (на популацијата)“, додаде тој.
Според АП, Синофарм објавувал многу малку податоци јавно.
СЗО веќе ги одобри вакцините Фајзер/Бионтек, АстраЗенека, како и нејзината верзија произведена на Институтот во Индија, Џонсон и Џонсон, додека Модерна доби одобрение пред шест дена.