Полицијата во Сент Винсент и Гренадини, островска нација во Карипското Море, во вторник пронајде брод насукан покрај брегот на островот Кануан со остатоци од 11 лица за кои веруваат дека можеби се од Мали, иако нивниот идентитет сè уште е под истрага.
„На местото на настанот беа пронајдени неколку пасоши кои изгледа дека се од Република Мали“, изјави полицискиот инспектор Џуниор Симонс во видео порака, додавајќи дека човечките остатоци се во напредна фаза на распаѓање.
Локалната полиција во понеделник наутро доби извештај за брод кој се насука во Литл Беј на Кануан.
Симонс рече дека остатоците се транспортирани до копното на Сент Винсент и чекаат понатамошни форензички и истражни постапки.
Во блискиот Сент Китс и Невис, властите во јануари соопштија дека откриле брод на кој ги пронашле телата на 19 лица, за кои процениле, поради напредната фаза на распаѓање, дека долго време биле на море, објавува Хина.
Тие, исто така, пронајдоа документи за идентификација што укажуваат дека некои од тие патници потекнуваат и од Мали, земја од Западна Африка без излез на море.
Атлантскиот океан покрај брегот на Западна Африка е еден од најопасните морски патишта во светот, со силни западни струи и ветрови што можат да ги одвлечат бродовите далеку од курсот, забележува Ројтерс.