Маџари ја искористи предноста на домашен терен и со сигурна игра во поголемиот дел од натпреварот славеше над МКК Куманово со 94:78, во последниот меч од 13. коло на кошакарската Супер лига.
Дуелот понуди квалитетна кошарка, особено во првото полувреме, кога двете екипи одиграа отворено и со висок ритам.
Домашниот состав подобро го отвори натпреварот и по првата четвртина стекна двоцифрена предност (29:19).
Кумановци успеаја во неколку наврати да се доближат, но Маџари преку расположените Грин и Армстронг постојано наоѓаше одговор.
По тројката на Грин, негов 17. поен на мечот, домаќините на одмор заминаа со убедливо водство од 51:42.
Во продолжението МКК Куманово се обиде да се врати во натпреварот, предводен од Луковиќ, кој уште во третата четвртина стигна до дабл-дабл учинок. Сепак, предноста и понатаму беше на страната на Маџари, кој по три одиграни периоди водеше со 73:63.
Во последната четвртина домаќините повторно се одлепија на 79:64, а иако гостите со серија од 8:0 накратко ја намалија разликата, тајм-аутот на тренерот Тодоровиќ донесе стабилизација во играта на Маџари. Домашниот тим брзо ја врати двоцифрената предност и рутински го приведе мечот кон крај за конечни 94:78.
Армстронг беше најефикасен кај победниците со 27 поени, четири скока и четири асистенции, додека Грин додаде 23 поени, осум асистенции и четири скока. Хот мечот го заврши со 14 поени и седум скока.
Кај МКК Куманово се истакна Луковиќ со 25 поени и 19 скока (индекс 44), Стевановиќ постигна 18 поени, а Радукиќ додаде 10.
Со оваа победа Маџари стигна до седмиот триумф во сезоната и се изедначи со скорот на МКК Куманово (7-6), што дополнително ја заострува борбата во средината на табелата по 13 одиграни кола.
Никола Ивановски