Пакистанското регулаторно тело за медиуми денеска објави дека ја блокирало услугата на Википедија во таа земја поради кршење на муслиманските чувства со тоа што не се отстрануваат намерно објавените богохулни содржини од порталот.
Критичарите го осудија потегот на пакистанската влада, велејќи дека тоа е удар за дигиталните права.
Според пакистанските контроверзни закони за богохулење, секој што е прогласен за виновен за навреда на исламот може да биде осуден на смрт, но земјата допрва треба да изрече смртни казни.
Сепак, дури и наводите дека е направен таков прекршок често се доволни за да предизвикаат масовно насилство или дури и смртоносни напади.
Меѓународните и домашните групи за човекови права велат дека обвиненијата за богохулење често се користат за заплашување на верските малцинства и за решавање на лични спорови.
Пакистанската телекомуникациска управа соопшти дека ја блокирала Википедија бидејќи бил игнориран рокот од 48 часа за отстранување на непристојната содржина, изјави портпаролката на владиното тело.
„Таквите работи ги повредуваат чувствата на муслиманите“, рече Малахат Обаид од тоа регулаторно тело.
Таа рече дека пакистанските власти разговараат со претставници на Википедија и дека забраната може да биде укината доколку платформата целосно ја отстрани антиисламската содржина.
Фондацијата Викимедија ја потврди забраната во саботата, изразувајќи надеж дека пакистанската влада „ќе им се придружи во нивната посветеност на знаењето како човеково право и итно ќе обезбеди пристап до проектите на Википедија и Викимедија за да може народот на Пакистан да продолжи да прима и споделува знаење со светот“.
Пакистанскиот експерт за социјални медиуми Мохсин Раза Кан рече дека е лесно да се ажурираат или заменат материјалите на Википедија кои се сметаат за богохулни или навредливи за муслиманите, така што блокирањето на порталот не е решение.
Фондацијата за дигитални права со седиште во Лахор претходно ја нарече забраната на Википедија навреда на правото на Пакистан за пристап до информации и исмејување на посветеноста на земјата да ги почитува своите обврски за човекови права.
Пакистан претходно накратко го забрани TikTok поради наводно прикачување на неморална, непристојна и вулгарна содржина. Забраната подоцна беше укината кога TikTok го увери Пакистан дека ќе ја отстрани таквата содржина и ќе ги блокира корисниците кои поставуваат таква содржина на социјалната мрежа.
Исто така во 2008 година, Пакистан го забрани ЈуТјуб поради видеата на пророкот Мухамед. Муслиманите веруваат дека физичкото прикажување на пророкот е богохулно.