Движењето ЗНАМ – За наша Македонија денеска во Куманово го претстави делот од програмата што се однесува на подобрување на сообраќајот во градот и околните населени места.
Како што истакна кандидатот за советник на движењето, Игор Липковски, приоритет ќе биде безбедноста, функционалноста и современиот урбан развој.
„Современиот град се препознава по безбедниот, ефикасен и уреден сообраќај. Затоа, општина Куманово во новиот мандат ќе продолжи со силен фокус на подобрување на урбаната мобилност, зголемување на безбедноста на сите учесници во сообраќајот и создавање инфраструктура што одговара на современите потреби на граѓаните,“ изјави Липковски.
Тој потсети дека во изминатиот период се реализирале значајни проекти кои го унапредија сообраќајниот систем.
Во изминатиот период, рече тој, се реализираа низа проекти што го унапредија сообраќајниот систем – реконструирани улици и тротоари, изградени кружни текови, поставена современа сигнализација и воведен бесплатен јавен превоз.
„Сето тоа е доволен показател Куманово да биде наречено пример за град кој се движи напред – безбедно, одговорно и со јасна визија“, рече тој.
Во следниот период, според најавите, предвидени се повеќе инфраструктурни зафати – целосна реконструкција на булеварите и главните сообраќајни артерии, изградба на три нови кружни текови, нови звучни семафори за лица со попреченост, како и модерни автобуски стојалишта и проширување на линиите на бесплатниот јавен превоз.
Покрај тоа, во програмата се планира и фазно формирање на пешачки зони и велосипедски прстен околу централното градско јадро, уредување на дополнителни паркинг-простори, меѓу кои и подземни катни гаражи и модуларни паркинзи, како и подобрување на урбаната мобилност со системи за паметен сообраќај.
„Безбедниот сообраќај е одговорност на сите – и на институциите, и на граѓаните. Секој уреден премин, секој кружен тек и секој метар тротоар значи повеќе безбедност и повеќе сигурност за нашите деца, ученици и постари граѓани. Куманово ќе продолжи да вложува во модерна, безбедна и достапна урбана инфраструктура, затоа што секој чекор, секое возење и секое патување во нашето Куманово мора да биде безбедно,“ додаде Липковски.