Канадскиот министер за енергија Џонатан Вилкинсон вчера ги отфрли тврдењата на новоизбраниот американски претседател Доналд Трамп дека на Америка не и треба ништо од Канада и предупреди на потенцијални одмазднички трговски мерки од Отава, вклучително и извозни даноци на нафта.
Одговарајќи на изјавите на Трамп дека постои можност за зголемување на царините до 25 отсто, Вилкинсон рече дека САД немаат лесно достапна алтернатива за канадската сурова нафта, ураниум и други критични минерали, пишува Блумберг.
„Поголемиот дел од суровата нафта произведена во САД е лесна нафта. Рафинериите во средниот запад (САД) се формирани за тешка сурова нафта и немаат алтернатива за користење на канадските ресурси – тоа не е економско. Дури и алтернативата што постои за некои од рафинериите за тешка нафта е Венецуела“, заклучи Вилкинсон, еден од кандидатите да го замени премиерот во заминување Џастин Трудо.
Тој посочи дека Кина е втора опција за САД кога станува збор за набавка на минерали, додека Русија би била втор избор за ураниум и рече дека е „едноставно лажно“ дека на Вашингтон не му треба ништо од Канада.
Вилкинсон изјави за Блумберг дека директорите на канадската нафтена компанија се загрижени поради заканата на Трамп за зголемување на царините, но дека веруваат дека постои можност да се разговара за тарифите, како и за идна соработка, со претставници од новата американска администрација.
„Значи, (има) загриженост секако, но нема паника. Луѓето се доста стратешки ориентирани за ова“, рече тој, пренесе Танјуг.
Вилкинсон истакна дека Канада се обидува да го одврати Трамп од зголемување на царините, но дека Отава „ќе мора да одговори“ ако тоа се случи, без оглед на потенцијалните исклучоци за енергија или нафта.
„Нема шанси Канада да застане и да го гледа уништувањето на нашата автомобилска индустрија или други индустрии. Ќе мораме да одговориме на промислен начин, на начин што всушност ќе создаде максимален притисок врз претседателот и врз земјите кои имаат корист од трговијата што ја прават со Канада“, рече министерот.
Тој не ја отфрли можноста за извозни даноци на нафтата, но повтори дека Отава ќе инсистира да го одврати Трамп од употреба на економска сила преку разговори и укажа на негативното влијание што планот на републиканците ќе го има врз американските потрошувачи.
„Ако воведат царини за нафтата, тоа ќе доведе до повисоки цени на пумпата во САД. Ако ги зголемат тарифите на струјата, на хидроелектраната, ќе поскапи струјата за потрошувачите. За релативно краток временски период, тие ќе забележат пораст на цените и зголемување на инфлацијата“, рече Вилкинсон.
Тој предложи проширување на соработката со САД, наведувајќи ја како пример фабриката за преработка на германиум од рудникот на Алјаска во Британска Колумбија и посочувајќи дека постои можност за проширување на производството на овој метал.
Трамп претходно неколку пати сугерираше дека Канада треба да стане 51-та сојузна држава, отфрлајќи ја идејата за употреба на воена сила за припојување на Канада кон САД, но не ја отфрли можноста за економска принуда.
Новоизбраниот републикански претседател на Америка претходно изјави дека границата меѓу двете земји е „вештачка линија“ и се закани дека ќе воведе царина од 25 отсто на увозот од Канада, која извезува 75 отсто од стоките и услугите во САД.