Европската унија (ЕУ) го обвини американскиот технолошки гигант Мета дека не успеал да ги спречи корисниците под 13 години да пристапуваат до Фејсбук и Инстаграм, кршејќи ги строгите дигитални прописи на ЕУ кои бараат од платформите на социјалните медиуми да ги заштитат малолетниците.
Европската комисија изјави дека платформите на Мета немаат ефикасни мерки за спречување на пристапот од страна на деца под 13 години и дека не прави доволно за да ги идентификува и отстрани децата кога отвораат сметки.
Мета има регулатива што ги поставува 13 години како минимална возраст за отворање сметка на Фејсбук или Инстаграм.
Проблемот не е само што децата добиваат пристап до овие платформи.
Европската комисија наведува дека Мета, исто така, несоодветно го проценува ризикот од изложеност на деца под 13 години на искуства несоодветни за возраста на тие платформи.
Мета сè уште не одговорила на барањето за коментар за ова предупредување.
Европската Унија ја повикува Мета да се придржува до Законот за дигитални услуги (DSA), сеопфатен сет на прописи што бараат од технолошките компании што работат во блокот од 27 земји да сторат повеќе за да ги средат онлајн платформите и да ги заштитат корисниците на интернет.
Мета има шанса да одговори на овие прелиминарни наоди пред Европската комисија да ја донесе својата конечна одлука.
Доколку се утврди прекршување на правилата, Европската комисија може да наложи високи казни до шест проценти од годишните приходи на компанијата.
Хена Виркунен, извршен потпретседател на Европската комисија, изјави дека истрагата на ЕУ започната во 2024 година покажала дека Инстаграм и Фејсбук „прават многу малку“ за да ги спречат децата да добијат пристап и покрај нивните сопствени услови дека нивните услуги не се наменети за малолетници под 13 години.
„Законот за дигитални услуги бара од платформите да ги спроведуваат своите сопствени правила – прописите и условите не треба да бидат само писмени извештаи, туку основа за конкретна акција за заштита на корисниците, вклучително и децата“, се вели во соопштението.