Либанскиот премиер Наваф Салам денеска изјави дека нема да прифати некој да ја вовлече неговата земја во, како што наведе, „авантури кои ја загрозуваат нејзината безбедност и единство“.
„Во врска со сериозните настани што се случуваат во регионот, уште еднаш ги повикувам сите Либанци да дејствуваат мудро и патриотски, ставајќи ги Либан и интересите на либанскиот народ над секое друго внимание“, рече Салам во изјавата испратена до Ројтерс.
Агенцијата потсетува дека либанската милитантна група Хезболах е сојузник на Иран.
Израел и Соединетите Американски Држави утрово започнаа напади врз Иран, по што Техеран одговори со напад на северен Израел.
Израелскиот министер за одбрана Израел Кац изјави претходно денеска дека Израел извршил превентивен напад против Иран за да ги елиминира заканите за безбедноста на земјата и дека е прогласена вонредна состојба низ целата земја.
Извор потврди за Си-Ен-Ен дека израелскиот напад врз Иран бил координиран со Соединетите Американски Држави.
Американските власти рекоа дека очекуваат нападот врз Иран да биде „далеку поопширен“ од американските напади во јуни минатата година врз иранските нуклеарни постројки.
Американските напади врз Иран се изведуваат од воздух и од море, изјави американски претставник за Ројтерс.