Претседателот на САД, Доналд Трамп, во саботата објави дека му наложил на Министерството за одбрана да се подготви за можна воена операција во Нигерија ако нејзината влада продолжи да „дозволува убивање на христијаните“.
Во објава на неговата социјална мрежа Truth Social, Трамп додаде дека американската влада исто така веднаш ќе ја прекине целата помош за Нигерија ако таа „сега посрамотена земја“ не преземе нешто за да го запре прогонот на христијаните.
„Ако нападнеме, тоа ќе биде брзо, сурово и слатко, исто како што терористичките насилници ги напаѓаат нашите САКАНИ христијани! ПРЕДУПРЕДУВАЊЕ: НИГЕРИСКАТА ВЛАДА ПОДОБРО ДА ДЕЈСТВУВА БРЗО!“, напиша Трамп, осврнувајќи се на исламските фундаменталисти во најнаселената земја во Африка.
Еден ден претходно, Трамп ја вклучи Нигерија на списокот на САД на земји од „посебна загриженост“ во врска со верската слобода, наведувајќи дека „христијанството таму се соочува со егзистенцијална закана“.
„Карактеризацијата на Нигерија како религиозно нетолерантна држава не ја одразува нашата национална реалност“, одговори на Икс нигерискиот претседател Бола Тинубу, муслиман во брак со христијанска пасторка, пред Трамп да се закани со воена акција.
Одлуката на Трамп доаѓа по месеци лобирање од страна на американските конзервативци кои веруваат дека христијаните во Нигерија се соочуваат со „геноцид“, објавува агенцијата Франс Прес.
Француската агенција пишува дека Нигерија, земја речиси подеднакво поделена на исламски север и христијански југ, е преплавена од конфликти во кои припадниците на обете религии страдаат подеднакво.
Повеќе од 15 години, североисточниот дел од земјата е сцена на џихадистичко насилство од страна на групата Боко Харам, кое одзеде повеќе од 40.000 животи и принуди два милиони луѓе да избегаат.
Во центарот на земјата има чести конфликти меѓу муслиманските сточари и претежно христијанските земјоделци, но експертите истакнуваат дека овие конфликти најчесто се случуваат околу земјата, додава Франс Прес.