Претседателот на Соединетите Американски Држави (САД) Доналд Трамп денеска изјави дека ништо нема да го загрози прекинот на огнот меѓу Израел и Хамас во Појасот Газа, и покрај обновувањето на насилството во областа.
Говорејќи пред новинарите на Air Force One на патот од Јапонија кон Јужна Кореја, Трамп рече дека Израел има право да одговори на нападите.
„Хамас уби израелски војник. Израелците возвратија. И тие треба да возвратат. Склучивме договор со Хамас според кој тие треба и мора да се однесуваат. Ако не го сторат, ќе бидат отстранети“, рече Трамп.
Неговата изјава дојде еден ден по ескалацијата во Газа, каде Израел го обвини Хамас за напад врз неговите војници на југот на територијата, во кој загина еден израелски војник.
Израелската војска соопшти дека нејзините воздушни сили потоа нападнале повеќе цели на Хамас како одговор.
Агенцијата за цивилна заштита што ја води Хамас соопшти дека неколку луѓе биле убиени во израелските напади.
Групата негираше одговорност за нападот врз израелските војници. Тврдењата не можеа да бидат независно проверени.
По стапувањето на сила на прекинот на огнот на 10 октомври, смртоносните инциденти продолжија.
Министерството за здравство на Хамас во Газа пред последните напади во текот на ноќта соопшти дека биле убиени повеќе од 90 Палестинци.
Пред околу една недела, двајца израелски војници беа убиени во напад со ракетен фрлач. Израел го обвини и Хамас дека го одложува предавањето на телата на заложниците, пренесува ДПА.