Украинскиот претседател Володимир Зеленски ја отфрли поканата на рускиот претседател Владимир Путин за преговори во Москва и наместо тоа предложи рускиот лидер да дојде во Киев.
Украинскиот лидер го разјасни својот став во интервју за ABC News, пишува Правда.
„Тој може да дојде во Киев… Не можам да одам во Москва додека мојата земја е под руски напади секој ден. Не можам да одам во главниот град на овој терорист. И Путин го разбира тоа“, рече Зеленски.
Зеленски истакна дека го гледа предлогот на Путин како начин за одложување на самата средба.
„Ако некој не сака да се сретне за време на војната, секако, може да предложи нешто што не може да биде прифатливо за мене или за другите“, забележа украинскиот претседател.
Да потсетиме дека Путин претходно јасно стави до знаење дека нема намера да патува никаде на разговори со Зеленски, но е отворен за средба во Москва.
Украинскиот министер за надворешни работи Андриј Сибиха, исто така, го оцени предлогот на Путин како „неприфатлив“.