Американскиот Сенат денеска го потврди назначувањето на генерал Ден Кејн за началник на Генералштабот на американската армија.
Кејн беше номиниран од американскиот претседател Доналд Трамп, а неговиот избор во Сенатот беше поддржан со 60 гласа за и 25 гласа против.
Гласањето се одржа непосредно пред двонеделниот одмор за двата дома на американскиот Конгрес пред празниците.
Во обраќањето до Сенатот на почетокот на април, генералот на воздухопловните сили Ден Кејн вети дека ќе ги „овековечи традициите и стандардите“ на неговата заклетва со тоа што ќе биде лидер „кој нема да зазема страна и кој секогаш ќе се труди да ја направи вистинската работа“.
Демократите остро го критикуваа невообичаеното разрешување на поранешниот началник на Генералштабот Чарлс Браун, тврдејќи дека Трамп сака да ги консолидира лостовите на моќта со назначување луѓе за кои се верува дека му се лојални на клучни позиции.