Фестивалот „Art attack“ утре со почеток во 19:00 часот ќе се одржи на плоштадот „Маршал Тито“ во Куманово.
Станува збор за фестивал кој е сплотување на неколку гранки од уметноста, во овој случај, електронската музика и филмската уметност.
Фестивалот ќе го отвори настапот на ди-џеј MAMBAQUINN во 19 часот.
Со почеток во 20 часот ќе биде емитуван македонскиот филм „Снежана на крајот умира“ во кој играат и неколку актери од Куманово.
Плоштадот ќе биде соодветно осветлен и озвучен, со поставено платно за проекција на филм, како и услови за мини пик-ник додека трае филмот, на зелената површина на самата локација.
Поради огрничен број на седишта (lazy bags) обезбедени од страна на организаторите, секој ќе има апсолутна слобода да си постави своја черга и да си обезбеди пијалак или храна.
Имено, „Снежана на крајот умира“ е социјална драма во амбалажа на комедија на апсурд, која се занимава со тоа колку е ужасно тешко да се остане чесен и верен на своите вредности во морално корумпирана средина.
Филмот е составен од три испреплетени приказни за три групи луѓе, една мува, едно прасе, една клозетска шолја и еден град, чии патишта се допираат и влијаат еден на друг.
Главните улоги во филмот ги толкуваат Верица Недеска, Наташа Петровиќ, Сашко Коцев, Дениз Абдула, Ивица Димитријевиќ, Давид Јанакиев и Тино Костадиновски. Сценарист и режисер на филмот е Кристијан Ристески, продуцент е Дарко Попов, кинематографери се Димо Попов и Севдије Кастрати, монтажер е Горан Вуќиќ, композитори се Александар Пејовски и Ставрос Макрис, сценограф е Сашо Блажевски, костимограф е Емилија Ивановска Атанасовска, дизајнер на звук е Грег Малканџи, маскер е Мојца Горогранц Петрушевска, кастинг директор е Мони Дамевски.
Во меѓу време, додека на Плоштадот се случува проекцијата на филмот, исто така, со почеток во 20:00 часот, во НУЦК „Трајко Прокопиев“, во рамките на фестивалот „Денови на комедија“ ќе се игра претставата „Кафез кај Кокони“ од Драмски театар – Скопје.
По завршување на проекцијата, програмата продолжува околу 22:00 часот со уште два ди-џеј сета.
„DADO K & MAMLI” ќе настапат oд 22:00 до 23:00 часот и Шалајко од 23:00 до 00:00 часот.
Никола Ивановски